Jose Maria Setien 1979tik 2000ra izan zen Donostiako apezpiku. Urte hartan, iktus bat izan zuen, eta beste iktus baten eraginez zendu da bart, 02:00ak inguruan, Donostiako ospitalean. Hernanin jaioa zen, eta 90 urterekin hil da.
Setienen omenezko hileta elizkizuna bihar egingo dute, Donostiako Artzain Onaren katedralean. Jose Ignacio Munilla Donostiako egungo gotzainak gidatuko du elizkizuna. Azken agurra ematera bildu nahi dutenentzat, hil kapera irekita egongo da, gaur, 14:00etatik aurrera, Artzain Onaren katedralean.
Elizan zuen karguarengatik pertsona ezaguna izan da Setien, baina baita Euskal Herriko gatazkari buruz egin zituen adierazpen politikoengatik ere. Setienek nabarmendu zuen Elizak ezin ziola Euskal Herriko gatazkari bizkar eman.
Haren jarreraren adierazgarri, berak idatzitako liburua: Setien. Un obispo vasco ante ETA (Setien. Gotzain euskaldun bat ETAren aurrean). ETAren jarduna gaitzetsi zuen, baina harekin "bigun" aritzea leporatu izan zioten zenbait sektore ez-abertzaletatik. Bestalde, Euskal Herriaren erabakitzeko eskubidearen alde agertu izan da, baita ETAri amaiera eman eta gatazka gainditzeko bake prozesua bultzatzearen alde ere.
2003an, Urrezko Domina eman zion Gipuzkoako Foru Aldundiak, "komunitatearen alde zuzentasunez eta koherentzia intelektualez aritu delako lanean, eta justizia, elkartasuna, askatasuna eta norbanakoen eta taldekoen eskubideak errespetatzea eraginkortasunez defendatu duelako".
Erreakzioak
Iñigo Urkullu Eusko Jaurlaritzako lehendakariaren esanetan, pertsona eredugarria izan da Setien, "bizitzan konpromiso zuzena eta zintzoa erakutsi zuena". Twitter bidez nabarmendu du gotzainak bizikidetzaren aldeko konpromisoa izan zuela.
JOSE MARIA SETIEN GOIAN BEGO! Jose Maria Setien, Donostiako Gotzain emeritua hil da.
— Iñigo Urkullu (@iurkullu) 2018(e)ko uztailaren 10(a)
Pertsona ona, formazio sakona eta bokazio sendoa zuena. Bizitzan konpromiso zuzena eta zintzoa erakutsi zuena beti. Bere gertutasuna eta eskuzabaltasuna eredu izan dira Elizan eta gure Herrian. pic.twitter.com/eq3Rw2mjzn
Bizikidetza erein zuen gure artean eta hazi hori zaintzen eta indartzen jarraituko dugu. Donostiako gotzain maitatua, goian bego!
— Iñigo Urkullu (@iurkullu) 2018(e)ko uztailaren 10(a)
Agur eta ohore, On Jose Maria Setien!
Gipuzkoako ahaldun nagusi Markel Olanok ere Setienen ibilbidea goratu du. Haren hitzetan, "lider sozial eta espiritual bat" izan zen, eta gizartean utzi duen arrastoa "sakona" izan dela ziurtatu du.
Bart zendu da Jose Maria Setien Gipuzkoako gotzain emeritua. Bizitza guztia euskal eliza eta gure herriaren alde emana, bakearen eta justizia sozialaren bila beti; lider sozial eta espiritual bat joan zaigu, sakona da gizartean utzi duen arrastoa. pic.twitter.com/FSSqWP8Krp
— Markel Olano (@markelolano) 2018(e)ko uztailaren 10(a)
Maddalen Iriarte EH Bilduko legebiltzarkideak, Radio Euskadin egin dioten elkarrizketa batean, adierazi du Setienek elkarrizketaren eta bakearen aldeko jarrera izan zuela euskal politikari dagokionez. "Eliza katolikoaren barruan berarentzako erraza ez zen egoera egokitu zitzaion, baina Gipuzkoako Elizako jarraitzaileen babesa izatea lortu zuen, eta hori oso garrantzitsua dela iruditzen zait gotzain baten ikuspegitik".
Alfonso Alonso Araba, Bizkai eta Gipuzkoako PPko presidentearen iritziz, Setienek "ahalegina" egin zuen Eliza katolikoa "bizirik" mantentzeko. Hala ere, Alonsok adierazi du ez zuela behar besteko "ulermena" izan "terrorismoaren biktimekin".
