Joseba Kanpo euskaltzalea gaur goizaldean hil da, gaixotasun baten ondorioz. 1955. urtean jaio zen, Bilbon, baina Otxandioko herritartzat zuen bere burua. Han bizi izan zen beti, eta herri horretakoa zuen familia. AEKn lan asko egin zuen Kanpok, eta aurreneko Korrika antolatu zuen taldeko partaidea izan zen. Aurreneko Korriketan sustatzaile garrantzitsua izan zen Kanpo.
Aurtengo Korrikan, 2015. kilometroa egin zuen, Itzubaltzetan, Urtsa Erraztirekin batera. Korrikako arduradunek omenaldi modukoa egin zieten Kanpori eta Erraztiri. Bilboko Txomin Barullo konpartsaren sortzaileetako bat ere izan zen Kanpo, eta azken urteetan Itzubaltzetako fanfarrean ere aritu zen. Musikazalea zen oso.
Haren heriotzarekin atsekabea azaldu du sare sozialetan Mertxe Mugika AEK-ko koordinatzaileak.
Joseba Kanpo KORRIKAren sustatzaileak utzi gaitu. Zuk ereindako uztak jarraipena izango du. Eskarrik asko eta adiorik ez
— Mertxe Mugika (@MertxeMugika) May 27, 2013
AEK-k ere Kanpo zenaren lana goraipatu du: "Amets egin zenuen, eta ametsa egia bihurtu. Ez zaitugu ahaztuko, ez zu ez gainontzekoak, Joseba; eta lasai, ze, "Korrika goaz, iritsi arte gure herriko helmugara"".
