ETAri laguntza ematea leporatuta atxilotu zituzten Camacho eta Balda, 2010eko otsailean. Zazpi urte eta erdiko zigorra bete dute osorik, eta gaur goizean irten dira kartzelatik.
Atxilotu zituztenean, torturak salatu zituzten biek. Camacho erietxera eraman zuten, eta hark azaldu zuen poltsa egin ziotela, eta hainbat ariketa fisiko eginarazi. Baldak ere torturak jasan zituela salatu zuen orduan Amnistiaren Aldeko Mugimenduak: "Askotan jarri diote poltsa buruan, arnasarik gabe uzteraino, eta, gehiago ezin zuenean, lurrera erortzen zen. Lurrean zela, gainera botatzen zitzaizkion guardia zibilak. Mehatxu asko egin dizkiote alabarekin, semearekin eta bikotearekin. Umiliazio eta irain handiak jasan ditu".
