Ilunbeko zezen plazan elkartuko dira bihar errege ohiaren etorreraren eta zezenketen aurka protesta egiteko. Donostiako errepublikanoek, zezenketen aurkako Orain! plataformak eta EH Bilduk deitu dute, besteak beste, bilkuran parte hartzera. “Euskal gizartearen erabakitzeko eskubidea” aldarrikatzera ere deitu du koalizio abertzaleak.
Azken bi urteetako Aste Nagusian, 2013an eta 2014an, ez zen zezenketarik izan Gipuzkoako hiriburuan. Aurten, ordea, Chopera familiaren enpresak Illunbe alokatu du, eta, udalaren baimenarekin, hilaren 13tik 16ra zezenketak egingo dituzte bertan, bihartik aurrera alegia.
Duela bi egun manifestazioa egin zuten hiriaren erdigunea zeharkatuz, zezenketen aurkako Orain! plataformak deituta; besteak beste, "zezenak zelaian", "animaliak askatu", "zezenketarik ez" eta "Donostia antitaurinoa" oihukatuta. Eta bihar jarraipena izango dute protestek, arratsaldeko 17:30etan, Ilunbeko zezen plazaren atarian.
