"Entzun dut herritarrek esan dutena; beste aukera batzuen alde egin dute", adierazi du Juan Karlos Izagirrek Donostiako Udala utzi egingo duela jakinarazteko agerraldian. "Ez dago aitzakiarik; EH Bilduren proiektua beste pertsona batzuen esku uzteko garaia da", gaineratu du. Ricardo Burutaranek hartuko du Izagirreren tokia.
Ez du hartuko Donostiako zinegotzi kargua, baina politikan jarraituko duela zehaztu du: "Oinarrizko militante izango naiz EH Bildun. Nire ekarpena hobea izango da hala”. Bere betiko profesiora itzuliko dela ere iragarri du: medikuntzara.
Lantaldeari esker onak eman dizkio azken lau urteotan eginiko lanaregatik, eta egungo Donostia eurak sartu zirenean baino hiri "hobea" dela azpimarratu du. Gardentasunez gobernatu dutela nabarmendu du, ez hauteskunde interesez.
Joan den maiatzaren 24ko hauteskundeen emaitzen ostean, hirugarren indarra da EH Bildu Donostian. Emaitzen balorazioa egiteko prentsaurrekoan, dimisioa emango ote zuen galdetuta, Juan Karlos Izagirrek adierazi zuen "garrantzitsuena" proiektua zela, "ez Izagirrek zer egingo duen": "Erakutsi dugu beste eredu bateko Donostia posible dela", gaineratu zuen.
EAJ lehen indarra
Donostian EAJren zerrenda nagusitu zen azken hauteskundeetan, 29.029 boto eskuratuta (botoen %29,65). PSE-EE izan zen bigarren indarra hiriburuan, 24.007 botorekin (%24,52), eta hirugarren indarra da EH Bildu; aurreko hauteskundeetan Bilduren zerrendak baino mila boto pasatxo gutxiago jaso baditu ere, portzentualki lau puntu inguru gutxiagoko babesa lortu du —21.110 boto lortu zituen 2011n, eta 20.467 boto orain; hala, %24,96tik %20,91ra—.
