Atzoko eguna baliatu zuen Eusko Jaurlaritzak drogen kontsumoari buruzko azken txostena aurkezteko: Drogen Erabilera Desegokiaren eta Legez Kanpoko Trafikoaren Aurkako Nazioarteko Egunean. Carmen Vicioso Droga menpekotasunen Zuzendaritzako zuzendariak nabarmendu zuenez, oro har ez da handitu drogen kontsumoa.
Droga moten artean, legezkoak direnak, alkohola eta tabakoa, dira gehien kontsumitzen direnak, ikerketarekin ondorioztatu dutenez. Bi horietatik alkohola da gehien kontsumitzen dena, bereziki 18 eta 24 urte bitartekoen artean eta asteburuetan. Baina joera hori jaisten ari da azken urteotan. Bide horretatik jarraitzea espero du Viciosok. Tabakoari dagokionez, kontsumoa antzeko mailan mantentzen da, baina gero eta gehiago dira tabakoa uzten duten pertsonak.
Legez kanpokoak diren drogei dagokienez, mota guztietako substantziak gutxiago kontsumitzen dira, Viciosok jakinarazi duenez. Kalamuaren kontsumo mailan izan da jaitsierarik nabarmenena: azken 16 urteetan lehen aldiz, jaitsi egin da kontsumoa, bereziki 15 eta 24 urte dituztenen artean. Viciosoren esanetan, kontsumoak eragiten dituen ondorioez ohartzeak eragin du kontsumoaren jaitsiera hori.
Inkestaren ezaugarriak
Eusko Jaurlaritzak 2.016 pertsona galdekatu zituen iazkoazaroaren 23tik abenduaren 17ra: Araban 464, Bizkaian 864 eta Gipuzkoan 688. Droga menpekotasunen Zuzendaritzak bi urtero egiten du drogei buruzko ikerketa. 15 urtetik 74 urte bitarte dituztenen artean drogen hedatze eta kontsumoak zer-nolako ezaugarriak dituen jakitea, hori da helburua. «Hartzen diren neurriak etengabe hobetu ahal izatea dakar informazio hori edukitzeak», dio Viciosok.
Adingabeen artean edozein motatako drogen kontsumoa saihesten ahalegintzeko asmoz, lanean hasiko da Eusko Jaurlaritza datozen bi urteetan.
Alkoholaren kontsumoa bikoiztu egin dela esan du Nafarroako Gizakia Helburuk
Alkoholarekin arazoak dituzten lagunen kopurua bikoiztu egin zen iaz Nafarroako Gizakia Helburu zentroetan, 2006. urtearekin alderatuta. Opiodun drogen kontsumoak, azken urteetan bezala, beheranzko joera du: %24tik %7ra. Kokainak, bestalde, goranzko joera du, eta horixe da zentroetan tratamendu gehien eskatzen diena.Iazko datuen txostena aurkeztu zuen Nafarroako Gizakia Helburu elkarteak herenegun. Kontsumitzailearen profila aldatzen ari dela nabarmendu zuten, baita kontsumitzen diren substantzia motak ere, Cristina Gomena elkarteko zuzendariordeak argitu zuenez: «Azken urteetan heroinaren kontsumoa jaitsi egin dela ikusi dugu, kokainarena handitu, eta alkoholak duen arriskuarekiko arreta handiagoa hartzen ari dela jendea».
