San Ignazioko biribilgunean elkarretaratzea egin dute gaur goizean Ondarroako (Bizkaia) Kamiñaldeko luiziak kaltetutako bizilagunek. Luizia gertatu zenetik hiru hilabete igaro direnean, "kale gorrian" jarraitzen dutela gogorarazi nahi izan dute, kolore horretako kamisetak aldean zituztela. Euren etxeei begira bukatu dute protestaldia.
Lanak "erritmo onean" doazela esan dute asteon. Zunbeltz Bedialauneta alkateak 17 milioi euroko kostua izango dutela azaldu du. Iñigo Urkullu lehendakariak proiektua osatzeko eskatu zion atzo, "Jaurlaritzaren eskumena izan ez arren", diruz laguntzeko prest daudelako. Gobernuaren esanetan, Bizkaiko Foru Aldundiak dauka eskumena. Bedialaunetan bilera eskatu dio diputazioari; datorren astean egin nahi du.
