Nafarroako Gobernuak eman du gertatutakoaren berri. 13:20 aldera izan da. A-15 errepiderako Leitzako sarbidean izandako jazoera batean hil da kamioilaria, eta Foruzaingoa ari da ikertzen.
Lehen informazioen arabera, ertzain bat izan daiteke hiltzailea. Foruzaingoak atxilo hartu du jada. Hainbat hedabidek esan dute trafiko eztabaida baten ondorioz egin diola tiro, buruan. Europa Press agentziaren arabera, Iruñean bizi da ertzaina, eta Tolosara zihoan, lanera.
Eusko Jaurlaritzak elkarlan "osoa" eskaini dio auzia ikertuko duen epaileari eta Foruzaingoari. Estefania Beltran de Heredia Segurtasun sailburuak doluminak azaldu dizkie kamioilariaren senideei, eta jakinarazi du ertzainak zeraman pistola ez zela arauzkoa. Gaineratu du eskarmentu handikoa dela ertzaina.
