Ione Lozano Miranda (24 urte) Fleury Parisko espetxera bidali du Frantziako epaile batek, ETAko kidea delakoan. Astelehenean atxilotu zuten Frantzia erdialdean, Indren, ustez Poliziaren errepide kontrol batetik ihesi zihoala.
Atzo eraman zuten Parisko Auzitegira, eta Fiskaltzak kartzelatzeko eskatu zuen. Bart hartu du erabakia epaileak, pistola bat, agiri eta matrikula faltsuak edota lapurtutako autoa izatea ere egotzita. Ustez duela urtebete aldegin zuen Lozanok Frantziara, Guardia Zibilaren polizia operazio baten ostean.
Harekin batera zihoan gizonezko batek ihes egitea lortu zuela esan zuen Frantziako Poliziak astelehenean bertan. Ikerketen arabera, ustez Oier Gomez da ihes egin zuen laguna.
Atxiloketako gunea aztertzean, 48.000 euro aurkitu zituzten, ikerketako iturriek diotenez.
