Kataluniako Parlamentuak joan den uztailaren 25ean Generalitateak fiskalitateaz Espainiako Gobernuarekin egingo lukeen itunaren proposamena onartu zuen, CiU, ERC eta ICVren botoekin. PSCk puntu batzuetan alde bozkatu zuen. PP erabat aurka azaldu zen. Hona hemen proposamenaren gai nagusiak:
HELBURUAK
Kataluniak jasaten dituen zerga guztien gaineko erabateko eskumena lortzea; herrialde gisa sortzen dituen baliabide ekonomikoak erabili ahal izatea politika sozial eta hazkundeari aurre egiteko; eta leialtasun instituzionala bermatzea aldeen bidegabekeria eta ez-betetzeak saihesteko.
NEGOZIAZIOAK
Parlamentuak eskatzen dio Generalitateari finantzaketari buruzko negoziazioak hasteko Espainiako Gobernuarekin 2012. urte honetan. Horietan puntu hauek jorratuko lirateke:
Zergen kudeaketa. Kataluniak jasaten dituen zergen kudeaketak Kataluniako Ogasunaren ardura izan behar du, zeina hortaz arduratuko den administrazio bakarra izango den. Kataluniako Ogasunak beste administrazioekin elkarlanean aritu beharko du.
Erabakitzeko ahalmena. Kataluniak jasaten dituen zerga guztien eta bakoitzaren gainean erabakitzeko ahalmen erabatekoa izan beharko du Generalitateak.
Elkartasuna. Estatuari ordaindu beharreko eskumenen kostuak edo Kataluniari eragiten dioten zerbitzuen eta berezkoak dituen ordainketak eta lurraldeen arteko elkartasunari dagozkionak estatuarekin elkarlanean erabakiko dira, eta bost urtetik behin berrikusiko.
LANTALDEA
Espainiako Estatuarekiko negoziazioak gainbegiratu eta haiei buruzko erabakiak hartzeko eskumena izango duen lantalde bat sortzeko eskatzen du Generalitateak, zeina gobernuak eta proposamen horri sostengua agertu dioten parlamentuko indarrek osatuko duten.
