Ban Ki-moon NBEko idazkari nagusiak deituta, mundu osoko ehun agintari baino gehiago bildu dira New Yorken, klima aldaketari aurre egiteko neurriak eztabaidatu eta zehazteko. Horien artean dira Barack Obama AEBetako presidentea, Cristina Fernandez Argentinakoa, Evo Morales Boliviakoa... Enpresa arloko adituak eta gizarte arloko erakundeen ordezkariak ere bilkuran dira.
Nicolas Maduro Venezuelako presidenteak "borondate falta" leporatu die herrialde aberatsei, klima aldaketaren kontra neurriak hartzeko garaian. "Irtenbide kapitalistak" proposatzen dituztela uste du. "Amerikatik protesta egiten dugu, eta gure haserrea adierazten dugu ekonomia berdea deitu nahi dituzten eredu horien aurrean".
Bilera hasi aurretik, hala mintzatu da Ban Ki-moon: "Klima aldaketaren kostua zerbait jasanezina bilakatzen ari da; gobernu guztiei eskatzen diet akordio adierazgarri batekiko konpromisoa har dezaten".
Obamak plan bat aurkeztea espero da; horren arabera, 2030. urtearen aurretik AEBetako zentral elektrikoen karbono isuriak %30 gutxituko lirateke.
