Espainiako Auzitegi Konstituzionalak gaur hasi behar zuen aztertzen Sortu alderdiak ezarritako babes helegitea, baina ez da hala izan. Epaitegiko iturriek jakinarazi dute ez direla azterketa egiten hasi, baina ez dute zehaztu bihar edo etzi aztertuko duten. Elisa Perez Vera epaileari egokitu zitzaion ezker abertzaleak iazko otsailean aurkeztutako alderdi berriaren gaineko epaiaren txostena egitea.
Iñigo Iruin abokatuak Konstituzionalean babes helegitea aurkeztu eta urtebetera ekin dio erakunde horrek ebazteari ea Auzitegi Gorenaren epaiak —Sortu alderdien erregistroan sartzea eragotzi zuenak— Espainiako Konstituzioa urratu zuen eta ea, beraz, legezkoa behar duen izan edo Gorenaren epaia Konstituzioaren araberakoa izan zen.
Iñigo Iruinek 176 orritan argudiatu zuen zergatik urratu den Sorturen kasuan elkartzeko eskubidea (Konstituzioaren 22. artikulua) eta, zehazki, alderdi politiko bat sortzeko eskubidea (6. artikulua). Babes helegiteak dio, Auzitegi Gorenak "behar ez bezala murriztu" zuela "oinarrizko eskubide bat" eta epaileek egindako frogaren balorazioak eta araudiaren eta jurisprudentziaren erabilerak ez zutela behar bezala babestu alderdi politikoak sortzeko eskubide konstituzionala.
Era berean, kontuan hartuta Sortu alderdiak ez duela jardun, babes helegitearen arabera, Auzitegi Gorenak alderdien erregistroan izena ematea eragotzi izanak "berekin ekarri du estatu konstituzionala bera arriskuan jartzen duen 'behin-behineko legez kanporatze bat'".
Ezker abertzalearen alderdi berriak argudiatu zuen hutsegite garrantzitsuak egin zirela Sortu Batasunaren jarraipentzat jota: batetik, balizko iruzurra baloratzeko orduan Auzitegi Gorenak ez zuelako kontuan izan Alderdien Legeak ezartzen dituen zantzuak; bestetik, ez zituztelako aztertu alderdiaren estatutuak, ezta sustatzaileen ekintzak eta jarrerak edota ezker abertzaleko kideen hainbat jarrera ere; azkenik, indarkeriaren arbuioaren kontrazantzua eta haren izaera sendoa ere ez zituelako kontuan hartu.
Gogoan hartu behar da Auzitegi Gorenean zatiketa handia egon zela Sorturen epaian: bederatzi magistratuk bozkatu zuten epaiaren alde, eta zazpik kontra. Zazpi horiek boto partikular bateratua aurkeztu zuten, Juan Antonio Xiol epaileak idatzia, eta horrek pisu handia izan dezake Konstituzionalaren erabakian.
