Alarma egoera ezartzen duen dekretuaren arabera konfinamendua nork bere etxean egin behar duela gogorarazi du Ertzaintzak, eta nabarmendu debekatuta daudela aisialdirako eta bigarren etxebizitza batera joateko mugimenduak. Horregatik, zubia dela eta, Ertzaintzak eta udaletako poliziek kontrol gehiago ezarriko dituzte errepideetan eta garraio publikoan.
Ez da hori Ertzaintzak hartuko duen neurri bakarra. Komunikatu batean adierazi dutenez, ertzainek aukera izango dute errepideak ixteko eta ibilgailu jakin batzuen sarbideari murrizketak ezartzeko, betiere segurtasun edo osasun publikoko arrazoiak direla medio. Gidariei bidaia justifikatzeko arrazoi bat eskatuko diete, «egiaztatu» daitekeena. Ibilgailuan gehienez bi lagun joan daitezke. Hala egiten denean, bigarren bidaiariak atzeko eskerlekuaren eskuineko aldean jarri beharko du, ezarritako segurtasun distantzia errespetatuz.
Une honetan, alarma egoeraren ondorioz, herritarrak kasu jakin batzuetan bakarrik atera daitezke etxetik: besteak beste, lanera eta osasun zentroetara joateko, eta elikagaiak erosteko.
