EAEko Justizia Auzitegi Nagusiak joan den astean bertan behera utzi zituen Irungo Udalak hamabi udaltzain postutarako ezarritako hizkuntza eskakizunak, euskaraz ez dakitenentzat «diskriminatzaileak» zirela argudiatuta. Euskalgintzaren Kontseilua ez dago ados, eta larunbaterako elkarretaratzera deitu du EAEko Justizia Auzitegi Nagusiaren aurrean, Bilbon, 11:00etan hasita.
Euskaraz bizitzearen alde, batuz. Eskubide murrizketarik ez! lelopean egingo dute elkarretaratzea. Euskalgintzaren Kontseiluak bi ideia nagusi azpimarratu nahi ditu: Irungoaren gisako «esku hartzeekiko desadostasuna» eta euskaraz bizitzearen alde, erakunde, eragile eta herritarren «batasunaren beharra». Gainera, bihar bilera bat ere egingo dute eragile sindikal eta politikoekin, «irakurketa partekatzeko eta haien iritzia jasotzeko».
Babesa jasotzen hasi da Euskalgintzaren Kontseilua, eta elkarretaratzearekin bat egin dute, esaterako, Pirritx Porrotx eta Marimototsek. Euskaraz bizi nahi dutela aldarrikatu dute, Twitter bidez.
Txilipitok eta sudurgorriok, Irunen eta Euskal Irrian...euskaraz bizi nahi dugu.
— Pirritx Porrotx eta Marimotots (@KatxiporretaEus) May 19, 2021
Txikiak gara baina elkarrekin, indartsuak!
Batu gaitezen, katxiporreta!@kontseilua pic.twitter.com/TWWP7MmsZJ
