Legebiltzarrak onartutako testuan, kontzertua "aldebakarreko arriskua" duen tresna "solidario eta eraginkorra" da. EH Bildu abstenitu egin da, eta UPDk kontra bozkatu du.
Azken asteetan, Espainiako Estatuko ordezkari politiko ugarik jarri dute auzitan Arabak, Bizkaiak eta Gipuzkoak kupo bidez Espainiari ordaindu behar dioten diru kopurua, eta baita kontzertuaren eredua bera ere. Horien aurrean, kontzertuaren "defentsa aktiboa" egingo duela adostu du Eusko Legebiltzarrak, eta erantsi horretarako "beharrezkoak diren egitasmoak" abiatuko dituela. Halaber, dei egin die eragile instituzional, politiko, ekonomiko eta sozialei bat egin dezaten defentsa horretan.
EH Bilduko Unai Urruzunok azaldu du koalizio subiranistak kontzertua defendatzen baina "burujabetza osoa" aldezten duela, eta ez duela Euskal Herria Madrilen "sukurtsal" izaterik nahi. Urruzunoren esanetan, kontzertua defendatzea uler daiteke Espainiarekiko lotura gisa edo euskal estatu baten "abiapuntu" gisa, eta azaldu du EH Bildu bigarren interpretazioan kokatzen dela.
