17. Korrika "zoragarria" izan dela nabarmendu du gaur AEK-k, balorazioa egitean, "orain arteko jendetsuena" izan delako, baina baita "gizartea euskararen inguruan kohesionatzea lortu" duelako ere. Mertxe Mujika eta Edurne Brouard AEK-ko arduradunek esan dute euskararen aldeko aurtengo laskerketan ideologia askoko jendeak hartu duela parte, denek ere gogotsu oihukatu dituztela leloak eta, lehen ez bezala, hainbat gizarte eragile batera aritu direla Korrikaren ekimenetan —argazkiak ateratzen-eta—.
"Mezua ondo zabaldu da, Euskal Herriak primeran ulertu du eta, garrantzitsuena dena, Euskal Herriak bere egin du", adierazi du Brouardek gaur, Bilbon egindako prentsaurrekoan. Ondorioz, AEK-k "apaltasunez baina irmo" deritzo "bete-betean asmatu" duela. Gizarte eragileei gauzak elkarrekin egin daitezkeela adierazi die, eta "hausnartzeko" eskatu die.
Gainera, AEK-ren ustez, aurtengo lasterketan "bere ideologiaren zati bat etxean utzi du jendeak, batzen gaituenari helduz".
Hilaren 7an hasi zen 17. Korrika, Trebiñutik. Bukatu Donostian, lehengo domekan. 2.500 kilometro pasa egin dituzte Maitatu, ikasi, ari... Euskalakari lelopean.
