Irailaren 16an, Espainiako Kongresuko hizlarien tribunatik hizketan ari zela, Espainiako Konstituzioaren ale bat apurtu zuen Sabino Kuadra Amaiurreko diputatuak. Auzitegi Konstituzionalaren erreformari buruz ari ziren formalki eztabaidatzen, baina Kataluniako prozesu subiranista zegoen eztabaidaren funtsean.
Manos Limpias elkarteak salaketa aurkeztu zuen Kuadraren aurka, besteak beste Espainia iraintzea egotzita. Fiskalak artxibatu egin du salaketa, baina Kuadrari esan dio hain justu konstituzio horrek babesten duela hizlarien tribunatik esandako iritziak ez zigortzetik. Konstituzioaren 71. artikuluari egin dio erreferentzia fiskalak: "Diputatu eta senatariek haien funtzioen jardunean agertutako iritziengatik ukiezintasuna gozatuko dute".
Kongresuan bertan, keinu horregatik zigortu egin zuen Jesus Posada presidenteak Kuadra. Konstituzioaren alea apurtzeagatik barkamena eskatzeko eskatu, eta hark uko eginda, tribunatik egotzi zuen Posadak.
