Bilboko Jesusen Bihotzetik abiatu da martxa, bandea laranjek eta okupazioaren aldeko ikurrek koloreztatuta, eta Zea Mays eta Akerjenbe Sound System taldeek girotu du mobilizazioa, kamioi baten gainean jota. Ehunka izan dira hemeretzi auzipetuei babesa adierazi dieten gazteak.
Ohar bateratu bat argitaratu dute udaleko EH Bildu, Goazen eta Udalberri taldeek. Auzipetuen kontrako akusazioak erretiratzeko eskatu dute, eta Kukutza bota izana salatu. Indar politiko horietako ordezkariak ere manifestazioan izan dira.
Kukutzarekin elkartasun taldeak "gaztetxeen aurkako epaiketatzat" jo du datorren astekoa. 19 auzipetuak 2011ko irailaren 24an atxilotu zituzten. Desordena publikoa egotzi diete. Fiskaltzak hamazortzi eta 30 hilabete arteko espetxe zigorra eskatu du haietako bakoitzarentzat. Gainera, horietako biri beste delitu bat ere leporatu die: erresistentzia.
