Espainiako Poliziak hamasei tona txirla konfiskatu ditu Getariako (Gipuzkoa) eta Vigoko (Galizia) haztegietan eginiko ikusketa batzuetan. Portugalgo uretako eremu kutsatu batean arrantzatutako txirlak dira —arrantza debekatua dago han—. Moluskuak era irregularrean eramaten zituzten haztegietara, dokumentazioa faltsututa, ondoren Europako hainbat herrialdetan saltzeko. Ikerketak gaineratu du produkzioa handitu dutela Gabon garaiarekin batera izaten den eskaera aprobetxatuz. Txirlek ez zuten inongo elikadura kontrolik pasatzen osasunerako gutxieneko bermeak ziurtatzeko. Ikusketez gain, bi lagun atxilotu dituzte operazioan. Beste bederatzi tona ere konfiskatu ditu Portugalgo Poliziak, herrialde hartako hainbat haztegitan.
