Bart gaueko eurite eta haizeteek ondorioak izan dituzte Donostiako Aste Nagusian ere. Batis Ezeiza Piraten bozeramaileak Euskadi Irratian azaldu duenez, euriteen eraginez segurtasun protokoloa aktibatu, eta hustu egin zuten kaia. Suhiltzaileak goizean bertaratu dira kalteen balorazioa egitera. Bideoa: bart gaueko ekaitzaren irudiak (Donostiako Piratak).
[youtube]http://youtu.be/QJVtXA0mmxY[/youtube]
Goizean, auzolanerako deia egin dute Piratek, gunea konpondu eta lehenbailehen normaltasunera itzul dadin. "Azpiegitura aldetik eta ekonomikoki kolpea izan da hau Piratentzat. Nolanahi ere, inork ez du minik hartu, eta hori da garrantzitsuena. Besteari buelta emango diogu. Gure asmoa egitarauarekin aurrera jarraitzea da", iragarri du Ezeizak. 90.000 eurotik gorako galerak zenbatu dituzte, eta, egitarauarekin aurrera jarraitzea erabaki badute ere, ez dute baztertu aldaketak izatea.
Laguntza eskea egin eta kontu korronte baten zenbakia zabaldu dute Piratek (3035 0149 45 1490027294), "bakoitzak ahal duen neurrian laguntzeko aukera izan dezan". Halaber, herritarrei dei egin diete La Flamenkara, Kantina Piratara eta Nautiko gunera joatera eta parte hartzera: "Orain, inoiz baino gehiago, babesa behar dugu".
