Bilboko Errekalde auzoko Lanbideren bulegoan, bertako langile bati su-arma batez mehatxu egin dio herritar batek gaur goizean. LAB sindikatuak eman du gertatuaren berri, eta elkartasuna adierazi die langileari zein haren lankideei.
Diru sarrerak bermatzeko errenta eskatzer joan da herritar hori, eta Lanbideko langileak jakinarazi dio ez zitzaiola laguntza hori egokitzen.
Momentu horretan, "jaka altxatu" du eskatzaileak, eta su-arma bat erakutsi dio langileari, LABen esanetan. Pertsona horren aurkako salaketa bat jarri du langileak polizia etxean.
Gizarte zerbitzuak ematen dituztenentzat halako gertaerak "gero eta ohikoagoak" direla azaldu du LABek: "Abagune sozio-ekonomiko jasanezinak amildegira bultzatzen ditu pertsonak".
Sindikatuak herritarrei azaldu die Lanbideko langileek ez dutela "inolako erantzukizunik" krisi egoeran. Aldiz, Lanbide ez da gai egoeraren "larritasunari" aurre egiteko, sindikatuaren iritziz.
Lanbiden ari direnen egoera ere larria dela adierazi du LABek. "Gure lankideek arrisku psikosozial larriekin lan egin behar dute, estresa, lan zama ikaragarriak eta ezintasunari aurre eginez".
