Berez, lehen ere bazegoen edoskitze baimena pilatzeko eskubidea, baina enpresa batzuek ez zioten langileari aukerarik ematen hala egiteko, aukera lan hitzarmenean jasota ez baldin bazegoen. Kasu horietan, enpresariekin hitzartu behar zuten hala egiteko eskubidea. Orain, Langileen Estatutuaren aldaketarekin, langile guztiek egin ahalko dute, lan hitzarmenean jaso gabe egonik ere.
Legearen arabera, langileek eskubidea dute lanetik ordubetez ateratzeko haurra zaintzeko, haurrak bederatzi hilabete bete arte (zenbait kasutan urtebetera arte); ordubete hori bitan ere banatu daiteke; eguneko lanaldiari ordu erdi murriztu; eta eguneko ordu hori pilatzeko aukera ere badago, egunak osatu arte. Espainiako Gobernuak Langileen Estatutuaren 37.4 artikulua aldatu du, eta aurrerantzean langile guztiek izango dute aukera denbora hori pilatzeko. 28 egun izan daitezke guztira. Baimen ordaindua da, eta amak eta aitak har dezakete, nahi badute aldi berean.