Bildu maiatzaren 22ko udal eta foru hauteskundeetara aurkeztuko da, eta larunbatean aurkeztuko dituzte hautagaiak, Donostian. Ostiralean amaituko da hauteskunde batzordeetan alderdien arteko koalizioak aurkezteko epea, eta datorren astean hautagaitzak aurkeztuko dira. Pello Urizar EAko idazkari nagusiak azaldu zuen zenbait akordio estrategikoren ondorio dela Bildu, eta argitu zuten ez dela "B plana", Sorturen ez erregistratzeko eskaerei aipamen eginez.
Atzoko aurkezpenean, koalizioaren bultzatzaileek esan zuten "aldaketa politika eta soziala bultzatzeko" sortu dutela Bildu. Eusko Alkartasunak, Alternatibak eta abertzale eta ezkerreko independente talde batek parte hartu zuten aurkezpenean, eta epe luzerako proiektu bat dela zehaztu zuten. Pello Urizar EAko idazkari nagusiak, Oskar Matute Alternatibako bozeramaileak eta Bakartxo Ruiz Herritarron Garaia taldeko independenteak aurkeztu zuten proiektu hori.
Miren Amuriza bertsolaria, Xabier Solano musikariak eta Ramon Agirre aktoreak ere parte hartu zuten atzo aurkezpen ekitaldian.
