Larunbateko Internazionalista Eguna indar bereziz babesteko eskatu dute

Urtero legez, Askapenak aspalditik dauka antolatuta aurtengo Internazionalista Eguna. Gernikan (Bizkaia) jarria du ekitaldi nagusia, larunbaterako, Herriok independentzia lelopean. Egun osoko egitaraua prestatua du, herrien arteko elkartasunaren aldeko aldarria egiteko. Aurten, indar berezia izango duela uste dute antolatzaileek. Izan ere, Espainiako Auzitegi Nazionalak Askapenaren aurkako operazioa egin eta bertako sei kide espetxeratu berritan iritsi da eguna, eta, ondorioz, salaketak «zipriztinduko du» ekimena. Polizia operazioa salatzeko, atxilotuak askatu ditzatela eskatzeko eta Askapenari babesa emateko ekimena izango da urteroko ekitaldia. Halaber, Latinoamerikako herrien lehen independentziaren 200. urteurrena ospatuko dute.

Atzo egin zuten egitarauaren berri emateko agerraldia antolatzaileek, eta azken orduko aldaketak eginda eman behar izan zuten mezua: Askapenaren aurkako operazioaren «azken kolpea» salatuta; herenegun atxilotutako Uberka Bravo aska dezatela eskatuta. Mureten sartu dute preso,eta datorren asteartean aztertuko dute euroagindu eskaera. Irailaren 30etik preso dauden Askapenako kideak libre uzteko ere exijitu zuten.

Talde internazionalistaren ustez, «herrion elkartasuna zanpatzea, Euskal Herriak egun duen egoera zapuztea eta herri mugimenduei erasotzea» izan da Askapenaren aurkako operazioaren helburua. Taldeak bere eremuan «lan publiko eta agerikoa» besterik ez duela egin ohartarazi du. Bi norabideetako lana egin duela: «Munduko herrien borrokak gertutik ezagutu eta Euskal Herrian zabaldu», eta, «gure herriak duen egoera nazioartean ezagutarazi». Lanean jarraituko dutela adierazi dute.

Ezker abertzaleak bat egin du Internazionalista Egunarekin, «Euskal Herriaren independentziaren alde zein munduko burujabetzaren alde» egiten duelako.

Egitaraua

HILAK 16, LARUNBATA

11:00etan, Ziortza-Bolibarren. Bolivarren omenaldia.

11:00etatik aurrera, Gernikan. Kultur gunea Merkatu plazan. 14:00etan herri bazkaria. 19:00etan, ekitaldi politikoa Gernikako Pasealekuan. 21:00etan, kontzertuak. Gero, DJ Bull-ek girotuko du gaua Gaztetxean.