Jai daukate halako proiektu bat lau horma birrinduz geldituko dutela uste badute”. Erantzun egingo dutela berretsi dute gaur goizean Kortxoeneko lagunek. Gaztetxearen aldamenean dagoen plaza txiki batean egin dute agerraldia, hainbat ertzainen begiradapean. Bart bizi izandakoa irmoki salatu eta larunbatean egingo duten manifestazioaren berri eman dute: “Argi utzi nahi dugu saldu nahi diguten Donostia gris eta iluna koloreztatzen jarraituko dugula”.
Atzoko hustea eta eraisketa guztiz legez kanpokoak izan zirela jakinarazi dute: “Eraikinaren jabeek bidalitako hamar mertzenariok atea bota, eta burdinazko barrak eskuetan zeramatzatela, oso modu bortitzean kaleratu zituzten barruan lotan zeuden lagunak”. Era berean, Ategorrieta etorbidean protesta gisa burutu zuten eserialdian Ertzaintzak izandako jarrera gaitzetsi dute gazteek. Lagun bati borrarekin zauri larriak eragin zizkiela nabarmendu dute, besteak beste.
Larunbatera bitarte egunero 17:00etan Katalunia plazan egingo dituzten batzar eta propaganda ekimenetan parte hartzeko deia egin dute, bai eta larunbatean, ordu berean, egingo den manifestaziora joateko deia ere —Bulebarretik abiatuko da—.
