Guardia Zibilak lau lagun atzeman ditu bart Donostian eta Pasaian (Gipuzkoa), ETAko informazio talde bateko kideak direlakoan. Harkaitz Landaberea Torremocha, June Vilarrubia Mitxelena, Julen Etxaniz Garcia eta Saioa Urbistazu Arrieta dira atxilotuak.
Landaberea eta Urbistazu donostiarrak dira -azkena Pasaian bizi da-, Etxaniz pasaitarra -San Pedrokoa-, eta Vilarrubia lezoarra (Gipuzkoa). Amnistiaren Aldeko Mugimenduak (AAM) esan du Landaberea eta Vilarrubia Donostiako Intxaurrondo auzoan atzeman dituztela -bikotea dira-, Urbistazu Donostian Urbieta kalean eta Etxaniz Pasaian -azken bi horiek ere bikotea dira-.
Espainiako Auzitegi Nazionalak aginduta egin du operazioa. Polizia iturriek esan dute "ETAko kide legalak" direla.
2:15ean hiru lagun atzeman dituzte, eta bestea handik ordubetera.
Guardia Zibilak haien denen etxebizitzak miatu ditu. Donostian Urbieta kalean eta Intxaurrondo auzoan, eta Pasai San Pedron frontoitik gertu eta Proisa kalean -8:25 aldera joan dira Pasaiatik-.
Gaur 20:00etan elkarretaratzea egingo dute Intxaurrondon, Uliako bidegurutzean. San Pedron 19:30etik batzarra egingo dute, frontoian. Lezon ere ordu berean asanblada, Gurutze Santuaren plazan.
AAMk kezka agertu du atxilotuek jaso dezaketen tratuagatik, "Guardia Zibilak sistematikoki erabiltzen duelako tortura. Une honetan atxilotuak inkomunikaturik daude. Zer espero behar da gertatuko dela? Argi dago lau herritar hauek basatiki torturatuak izateko benetako arriskuan daudela".
Atxiloketak
Lau lagun atxilotu ditu Guardia Zibilak bart Donostian eta Pasaian, ETAko informazio taldekoak direlakoan
Harkaitz Landaberea, June Vilarrubia, Julen Etxaniz eta Saioa Urbistazu dira atxilotuak. Haien etxeak miatu dituzte; Donostian Urbieta kalean eta Intxaurrondon, eta Pasai San Pedron frontoitik gertu eta Proisan. Poliziak dio "ETAko kide legalak" direla. AAM torturen beldur da.
Iruzkinak
Ez dago iruzkinik
Ordenatu
