Lau oinarriren gainean adostutako plan bat aldarrikatu du Arnaldo Otegik

Euskal Herriarentzako zorioneko eguna dela esanez hasi du Arnaldo Otegi Batasuneko eledunak gaur arratsaldeko agerraldia. "EAJk 24 urte eta gero Estatutua baliogabetzen duen proposamena mahai gainean jarri du eta ezker abertzaleak arrazoi politiko historikoei arrazoia ematen die", adierazi du Otegik.

Batasuneko kidearen arabera, "garbi" gelditu da autodeterminazio eskubidearik gabe ez dagoela etorkizunik. "Ziklo politiko berri baten aurrean gaude, eta bide berri hori seriotasun guztiarekin kudeatu behar dugu", azpimarratu du.

Espainiako Gobernua eta PP gaur Gernikan bildu izana kritikatu du Otegik, "Gernika suntsitu zutenak orain Gernikako Estatutuaren alde agertu baitira. Ezker abertzaleak irabazitako etapa bat da hori". Hurrengo etapa Euskal Herriaren burujabetza onartzea dela esan du eta laugarrena Espainian Euskal Herriko enbaxadore bat jartzea.

Eusko Jaurlaritzari eta Hirukoari ere zuzendu zaio Otegi. "Planak ez du gatazka gainditzen, eta ezker abertzaleak ez du parte hartuko gatazka gainditzen ez duen ekimen batean, ez baitira orain dela 25 urte egindako akats berberak errepikatu nahi", gogorarazi du Batasuneko kideak. Ezker abertzaleari plana ez zaiola gustatzen nabarmendu du Otegik, baina hala ere, bere baitan osagai interesgarriak badituela azpimarratu du, eta oinarri horien eztabaidan ezker abertzaleak parte hartuko duela. Euskal Herria, zazpi lurraldeak, autodeterminazio eskubidea eta herri-kontsulta dira Otegik aipatzen dituen oinarriak.