EAJ, EH Bildu, PSE-EE eta PPren arteko akordioak lortzea jo du Eusko Jaurlaritzako Bake eta Elkarbizitzako zuzendari Jonan Fernandezek baketzearen erronka nagusitzat; ohartarazi du gai horretan adostasunera heldu beharko direla "edo ez da aurrera egingo".
Eusko Jaurlaritzak bake eta elkarbizitzarako plana egiterakoan oinarri gisa erabili duen analisia aurkeztu die gaur Fernandezek alderdiei. Legebiltzarreko Bake eta Bizikidetza Batzordeak egin dezakeen lana "ezinbestekotzat" jo du.
Fernandezen ustez, alderdi guztien arteko adostasunak "iraganaren irakurketa kritikoa" jaso beharko du, eta baita gaur egun nahiz etorkizunean bakea egonkortzeko egin beharreko urratsak zehaztu ere.
PP legebiltzarreko bake batzordean ez dagoela-eta, Fernandezek esan du PP kanpoan egonda ere familia politiko guztien arteko akordioa gertatuko dela: "Ez da erraza, baina gertatuko da".
