"Espainiako Estatuak prest jarraitzen du bere legediak jasotzen dituen eskubideak urratzeko, betiere gatazka betikotzeko helburu zikoitzari eusteko", salatu du ohar batean.
Sortuk gogoratu du egun 400 euskal preso inguru daudela Espainiako Estatuaren kartzeletan sakabanatuak "eta salbuespenezko neurriak pairatzen" ari direla. Oroitarazi du, halaber, hamasei senitartekok galdu dutela bizitza "sakabanaketa politikaren ondorioz" eta asteburuero presoen senide eta lagunak errepideetan "bizia galtzeko arriskura kondenatzen" dituela PPren Espainiako Gobernuak.
Sortuk azpimarratu du legedia "egokitu" egin behar dela "errealitate politiko berrira" eta "salbuespenezko zigor, espetxe eta auzibide politika" legedia arruntera itzuli beharra dagoela, besteak beste, sakabanaketa amaituz.
Era berean, ohartarazi du ez duela "inolaz ere onartuko" presoak "gatibu moduan" erabiliak izatea "prozesu independentista geldiarazteko". "Kalera atera behar dugu indarrez: presio instituzionala areagotu behar dugu; prozesua bultzatu nahi duten sektore guztien inplikazioa lortu; Espainiako Gobernuari espetxe politika kriminala mantentzea ezinezkoa egin behar diogu", azpimarratu du.
