Bilboko Arriaga antzokia gorriz jantzi da gaur. Izan ere, bertan bildu dira zenbait osasun langile, lurrean etzanda eta bata zuriak gorriz tindatuta, lehen mailako arretaren «egoera prekarioa» ikusarazteko. Salatu dute Osakidetzako lehen mailako arretan baliabide falta «handia» dagoela, eta sektoreko behin-behinekotasuna «oso handia» dela: «Erdiak baino gehiago dira behin-behinekoan kontratatuta daudenak; kasu batzuetan, %60ra heltzen dira. Eta zortzi urtera arte luzatu daiteke», adierazi dute.
Gainera, gehitu dute, Osakidetzako gastua Europako Batasuneko batezbestekoa baino ia %40 gutxiago dela, eta azken hamar urtean %13 urritu dela lehen arretarako dirua. Horregatik, osasungintzako langileen «ihesa» dagoela ondorioztatu dute: beste herrialde batzuetan baldintza «hobeak» eskaintzen dituztela, eta azken bost urteetan 17.000 osasungile inguru joan direla.
Horiek horrela, lehen mailako arreta «hiltzen» ari dela uste dute. Lanez «gainezka» daudela diote, falta diren langileen ordezkoak ez dituztela jartzen, eta hori, pandemia betean, kaltegarria dela. Berez «nahiko ahulduta» zegoen osasun sistemari koronabirusaren krisiak asko eragin diola uste baitute, eta horregatik beren osasuna «arriskuan» dagoela.
