"Oraindik ere badago gatazka politikoa", esanez hasi dute agerraldia 250 preso ohi inguruk, eta ohartarazi dute asko direla errealitateak eta haren ondorioak "itxuraldatu" nahi dituztenak. Hala ere, baikor agertu dira eta adierazi dute "gertu" dagoela irtenbidea. Adibide gisa jarri dituzte Frantziako Gobernua hasia dela euskal presoak gerturatzen eta hegoaldean ere gero eta gehiago direla sakabanaketaren aurka daudenak.
Ordea, nabarmendu dute gatazka konponduko bada, oinarrizkoa dela lehen gradua desagerraraztea. "Hori da gainditu beharreko lehen oztopoa". Gogora ekarri dituzte, baita ere, Kepa del Hoyo, Xabier Rey eta Belen Gonzalez presoen heriotzak, euren espetxe zigorrak betetzen ari zirela.
Azkenik, datorren asteburuan Bilbon egingo den manifestazioan parte hartzeko deia egin diete herritarrei. Martxa 17:30ean abiatuko da Casillatik, Bada garaia. Presoak kalera! lelopean.
