Gero eta kilometro gutxiago geratzen zaizkio 19. Korrikari Urepeletik Bilborako ibilbidea osatzeko. Ostiralean, Lizarrerrian ibiliko da, eta larunbatean joko du Arabarantz, handik Bilbora jotzeko. Bihar, Irunberrin hasiko du eguna, eta goizaldean igaroko ditu, besteak beste, Nabaskoze eta Otsagi. 13:00 alderako espero dute lasterketa Urrotzen, eta Garesen, berriz, 17:39ean. 20:25ean izango da Lizarran, eta Izurzun amaituko du eguna.
Eguzkipean, Erriberan, aritu da Korrika. Goizaldean igaro ditu Lodosa, Andosilla, Milagro eta beste hainbat herri. Ez da jendetzarik batu, baina etenik gabekoa izanda da atxikimendua eman eta parte hartu duten euskaltzaleen jarduna. Ablitasen, Errigorakoek eta zenbait nekazarik hartu dute kilometroa; Sasoian erretiratuen elkarteko lagunek ere egin dute korri; eta Tuterako suhiltzaileek hainbat kilometrotan hartu dute parte.
[YouTube]https://youtu.be/2clTMiWIXR8[/YouTube]
Cascanten, berriz, ugaritu egin dira korrikalariak, hango eskoletako haurrek hartu baitute parte.
Eguerdian Tuteratik pasa da. Jendetza bildu da han. Argia ikastolako haurrek, esaterako, gogotsu egin dute lasterka: "Askotan sentitzen dute ikasleek bakarrik daudela. Ilusio handia egiten die Korrikak", azaldu du irakasleetako batek. Porrotx pailazoa izan dute bidelagun haurrek.
Jendetza Tuteran, euskararen alde #euskahaldun#KorrikaZuzenean@berriapic.twitter.com/HYQwYdaLJA
— Hodei Iruretagoiena (@hirual) March 26, 2015Tuteratik, iparralderantz egin du Korrikak, arratsaldean Caparroso, Pitillas, Erriberri eta Tafalla igaro dituelarik.
