Madrilen bildu dira Eneko Goia Donostiako alkatea eta Margarita Robles Espainiako Barne ministroa, gaur goizean. Ordu bete inguru iraun du bilerak. Haren ostean, Goiak adierazi du "zaila" izango dela Espainiako Gobernuak Loiolako kuartel militarra Zubietara lekualdatzeko ezarri dituen baldintzak betetzea.
Goiak azaldu duenez, Madrilek Donostiako Udalaren bizkar utzi nahi du kuartel berria erakitzearen kostua, eta azpiegiturarentzako lursaila ere Donostiako Udalak jarri beharko luke. Horrez gain, Zubietan eraikiko litzatekeen kuartela egun Loiolan dagoenaren "baliokidea" izan beharko litzatekeela adierazi du Espainiako Gobernuak, Goiaren esanetan. Horrek "kostu oso altua" izango lukeela ohartarazi du. Madrilen eskakizunak aztertuta, Loiolako kuartela tokiz aldatzeko itxaropen faltsurik ez duela sortu nahi gaineratu du Goiak.
Donostiako Udalak kuartela Zubietara lekualdatzeko lursail bat eskaini zion Espainiako Gobernuari. Eremu berean espetxe bat eraikitzeko proiektua du Madrilek eta erraustegi bat eraikitzen ari da Gipuzkoako aldundia.
Donostiako Udalak eta Espainiako Gobernuak elkarrizketekin jarraitzeko borondatea agertu dute.
