Lokarri herritar sarea ere larunbatean Bilbon izango da euskal presoen eskubideen aldeko ekimenean. Sakabanaketa amaitzeko, presoei espetxe onurak emateko eta kartzeletako baldintzak hobetzeko eskatu du.
"ETAk indarkeria behin betiko utzi duela iragarri ostean, euskal gizarteak bizikidetza artikulatzeko erronka dauka", dio Lokarri-k. "Aro berrian ezin da aritu garai bateko estrategiekin".
Alternatibak ere gaur jakinarazi du larunbateko martxa "historikoan" parte hartuko duela.
Egin Dezagun Bideak antolatu du ekimena. 17:30ean hasiko da, Casilla aurrean.
Gaur Eusko Jaurlaritzako Herrizaingo Sailak lehengo astean Fernando Grande-Marlaska Espainiako Auzitegi Nazionaleko epaileak Ertzaintzari agindutakoa gogoratu du. Alegia, antolatzaileek eta manifestariek "legeak [presoentzat] aurreikusitako eskubideak aldarrikatu" besterik ez dutela egin behar, eta legez kanpokotzat jo duela presoen argazkiak erakustea eta 'preso politiko' adierazpidea erabiltzea. "Legez kanpoko aldarrikapenak" egingo balira, manifestazioa "berehala desegiteko" eskatu du epaileak.
