Balmasedan egin zuten atzo Euskal Eskola Publikoaren jaia, Gorantz goaz. Go! Go! lelopean.
Lau gunetan banatu zituzten ekintzak: Mendia eskolan, San Juan plazan, Seberino Deuna enparantzan eta gazte eta kirol gunean.
Inaugurazio ekitaldian parte hartu zuten besteak beste, Iñigo Urkullu lehendakariak eta Kristina Uriarte Hezkuntza sailburuak. LOMCE geldiarazteko beharra nabarmendu zuen Urkulluk, ohartarazi ezin dela hezkuntza "alderdikeriaz eta arma gisa" erabili. Uriartek, bere aldetik, adierazi zuen "jaia ez ezik, aldarrikapen eguna" ere bazela.
Euskal Eskola Publikoko Gurasoen Konfederazioko buru Carlos Lopezek, berriz, "atzerakoitzat" jo zuen LOMCE eta indarrean sar ez dadin neurriak hartzeko eskatu zion Jaurlaritzari. "Euskal eskola publiko hobea nahi dugu, euskalduna, gurea, parte hartzailea, laikoa, baliabide hoberenak izango dituena eta bere inguruan errotua egongo dena".
Adin guztietarako ekitaldiak antolatu zituzten Balmasedan: Pirritx, Porrotx eta Marimotots, askotariko tailerrak, jokoak...
