Londresi jarraitzeko eskatu die Madrili eta Parisi ezker abertzaleak

Eskozian egitekoak diren erreferendumaren egunaren inguruan aldeek izan ditzaketen interesak alboratuta, muinari begira, Erresuma Batuko Gobernuak «auzi politiko bati modu demokratikoan» heldu diola uste du ezker abertzaleak: «Eskoziarrek eskubidea daukate euren etorkizunaz eta beste estatuekiko harremanez erabakia hartzeko, eta horrela aitortu dio Erresuma Batuak», adierazi du Maribi Ugarteburu eledunak. «Ukazioaren bideari» utzi eta Londresek hasitakoari jarraitzeko eskatu die, halaber, Espainiako eta Frantziako gobernuei. Eskoziakoa eredugarritzat jo, eta Euskal Herrirako baliagarri ere badela esan du.