Gaixotasun larria du Jose Ramon Lopez de Abetxukok presoak; 63 urte ditu, eta horietatik 25 preso daramatza. Kartzelan daraman denbora gehiena gaixo eman du Gasteizko presoak. Haren egoerarekin kezka agertu dute Arabako hainbat sektoretako norbanakoek, eta, aske uzteko eskatzeko, sinadura bilketa abiatu dute.
Euren asmoa da presoaren askatasuna eskatzeko mozioa onar dezala Gasteizko Udalak. Ekinbidearen berri eman dute gaur goizean sinadura bilketa martxan jarri duten lagunek, eta, besteak beste, hauexek sinatu dute: Matti Iturralde eta Luis Galdos medikuek, Miguel Angel Ruiz hiesaren kontrako batzordeko buruak, Juan Mieg margolariak, Unai Grajales EAJko zinegotzi ohiak eta Juan Ibarrondo idazleak. Ekainaren amaiera bitartean bilduko dituzte sinadurak.
Gasteizko Udalean aurkeztu nahi duten mozioak hiru puntu ditu. Lopez de Abetxuko aska dezatela eskatuko dute haren bitartez, baita antzeko egoeran dauden preso gasteiztarrak ere. Halaber, haiek askatu bitartean gaixorik dauden Gasteizko presoak Zaballako (Araba) espetxera eramateko galdegingo dute. Azkenik, Gasteizko Udalari eskatuko diote Espainiako Auzitegi Nazionaleko Espetxe Zaintzari igor diezaiola onartutako akordioa.
