Lopez: «Euskadik ez du elkarrizketaren bultzatzailerik behar»

Patxi Lopez Eusko Jaurlaritzako lehendakariak berretsi egin du ez duela Harremanetarako Nazioarteko Taldearekin batzartzeko asmorik, horien «interesak» zeintzuk diren ez dakiela argudiatuta. «Euskadik ez du elkarrizketaren bultzatzailerik behar», adierazi du Lopezek, euskal herritarrak «indarkeriaren arazoa» konpontzeko gai izango direla uste baitu. «Guk geuk beste askori erakuts diezaiokegu nola hitz egiten den, eta adostasunera nola heltzen den», gaineratu du Lopezek. EAko legebiltzarkide Juanjo Agirrezabalari erantzunez esan ditu hitzok; elkarrizketa politikoa sustatzeko borondaterik ez izatea egotzi dio Agirrezabalak Eusko Jaurlaritzako lehendakariari.