Datorren ostegunean emango du Patxi Lopez (PSE-EE) Eusko Jaurlaritzako lehendakariak bakerako ekimenen berri, Eusko Legebiltzarraren osoko bilkuran, eta Lehendakaritzako iturriek gaur aurreratu dute haren xedea beste taldeekin akordioak lortzea izango dela, bakarrik ez geratzeko asmoz. Ondorioz, iturri haren arabera, ETAk borroka armatua bukatu osteko egoera berrian "Euskadin bakea eta bizikidetza egonkortzeko", "proposamen irekiak" egingo ditu Lopezek.
Lehendakariak esana du bi oinarri izango dituela akordioetara heltzeko: iazko irailean aurkeztu zuen dekalogoa eta lehengo otsailean Espainiako Kongresuko hainbat taldek erdietsitako hitzarmena. "Formula eta foro berriak" sortu nahi ditu. Joan den urtarrilean Mariano Raxoi Espainiako gobernuburuari euskal presoak gerturatzeko eta Sortu legeztatzeko eskatu zion.
EAJk eta IU-Ezker Anitzak azken egunetan Lopezi leporatu diote ez dela eurekin harremanetan jarri. Iñaki Oiarzabal EAEko PPko idazkari nagusiak gaur esan du ETAren bukaera lortzeko bidean inork ez lukeela protagonismorik bereganatu beharko.
