Lourdes Idoiaga Oñatiko alkate ohiaren aurka pankarta bat agertu izana salatu dute

Oñatiko (Gipuzkoa) alkate ohi Lourdes Idoiagaren aurkako pankarta bat agertu da Bergarako gaztetxean. Pankartak hauxe zioen: Zu zara erraustuko dugun lehen zaborra. Gertaera hori salatzeko EAJk aurkeztutako mozioa onartu du Bergarako Udalak aho batez. Astelehenean izan zen osoko bilkura.Bertan, elkartasuna agertu zioten Idoiagari. Gainera, Gazte Asanbladari eskatu zioten gertatutakoa salatzeko. Bilduk ez zuen onartu bigarren puntu hori. «Gu ez gara zein Gazte Asanbladari zer egin behar duen esateko». EAJri «ulertezina» iruditu zitzaion Bilduren jarrera. Gazte Asanbladako bi kide bilkuran izan ziren, eta pankarta jarri izana ukatu zuten. Gainera, aspaldiko kontua dela esan zuten. Gaur, Oñatiko Udalean eztabaidatuko dute mozioa.