Luis Intxauspe Arozamena Hernaniko alkatea izanen da, gaurtik aurrera, Udalbiltzako lehendakari berria. Gaur goizean Atarrabiako Kultur Etxean eginiko nazio batzarrean aukeratu dute ia aho batez: 107 aldeko boto eta abstentzio bakarrarekin.
Intxauspez gain, honako hautetsiek osatuko dute Udalbiltzaren gobernu berria: Jon Arriola (Berriatuako alkatea), Jon Andoni del Amo (Durangoko zinegotzia), Mikel Ansotegi (Aulestiko alkatea), Nekane Garagoigordobil (Legutioko alkatea), Iratxe Lopez de Aberasturi (Gasteizko zinegotzia), Haizea Isasa (Gamarteko zinegotzia), Itziar Varela (Hendaiako zinegotzia), Unai Lako (Agoizko alkatea), Maite Iturre (Baztango zinegotzia), Aritz Ikobalzeta (Etxarriko zinegotzia), Alaitz Aizpurua (Usurbilgo zinegotzia) eta Andoni Gartzia (Astigarragako zinegotzia).
«Gogoratu non geunden 1999an, eta begira non gauden gaur egun; erreparatu Nafarroan gertatzen hasi den aldaketari», esan du Intxauspek, aginte makila Mertxe Aizpurua lehendakari ohiarengandik jaso osteko hitzaldian. «Inoizko aukera onena dugu, Euskal Herri osotik eta Euskal Herri osoarentzat lan egiteko, baina, horretarako, Udalbiltzak eraldatzeko beharra dauka», ohartarazi du. Udal hautetsien erakundearen lehen erronka «apurtutako zubiak berreraikitzea» izanen dela ere esan du.
Aurretik, Aizpuruak hartu du hitza, kargua utzi aurretik azken agurra egiteko. Intxauspe zoriondu eta Udalbiltzako kide guztiei esker ona adierazi ostean, erakundearen garrantzia azpimarratu du: «Euskal Herria eraikitzeko dugu oraindik, eta, Udalbiltzak egiten ez badu, ez du inork egingo». Nafarroako ereserkiarekin bukatu da ekitaldia.
