Luis Mari Zengotitabengoak asilo politikoa eskatu dio Belgikari

Larunbatean atxilotu zuten Belgikan Luis Mari Zengotitabengoa, eta bihar erabakiko du Brujasko Auzitegi Federalak Espainiaratuko duen edo ez. Aurrez, asilo politikoa eskatu du Zengotitabengoak, Paul Bekaert bere abokatuak adierazi duenez. Atxilotuak gutun bat idatzi zuen atzo Belgikako Barne Ministeriora. Gutun horretan bere egoeraren berri eman du eta Espainian jasan ditzakeen giza eskubide urraketak aipatu ditu.

Belgikako Barne Ministerioak ez du baieztatu gutunik jaso duen edo ez. Baina, asilo eskaerak Zengotitabengoa Espainiaratzea atzeratu dezake, Brujasko Auzitegi Federalak ebazpena atzeratzea erabaki baitezake, bere estatus politikoa zein den zehaztu artean.