Birritan erori da mendi magala azken egunotan Ondarroan. 176 familia etxetik irtenarazi dituzte, eta Angel Toña Jaurlaritzako Gizarte Gaietarako sailburuak ziurtzat jo zuen erori egingo dela mendi hegala, baina ez dakitela noiz eta nola.
Luiziak zergatik gertatzen diren eta nola saihestu daitezkeen ulertzeko, Agustin Larrea geologoarekin mintzatu da Arantxa Iraola kazetaria. Haren esanetan, "normala" da luiziak gertatzea: "Gure topografia den bezalakoa da, eta lurra ez da inoiz egoten geldirik". Euria nola egiten duen, ordea, garrantzitsutzat jotzen du: "Pixkanaka egiten badu, lurrak finkatzeko astia izaten du; baina lehortea bada, lurra zabaldu egiten da, eta bat-batean euritea badator, kalte handia egiten dio lurrari".
Kontrol neurrien garrantzia azpimarratu du Larreak: "Ez dakigu ondo zer dagoen mendi barruan, eta beharrezkoa da mantentze lan egoki bat". BERRIAk bihar argitaratuko du Larreari eginiko elkarrizketa.
