Miurako zezenek eman diete amaiera sanferminetako entzierroei. Zezen bat oso atzeratuta geratu da, eta hark sortu du arrisku gehien. Mercaderesen, Estafeta kalea hasten den tokian, lagun bat behin baino gehiagotan adarkatu du Olivito zezenak. Beste bi lagun ere adarkatu dituzte. Gainerakoan, hainbat eroriko izan dira; gainera, lurra bustita zegoen.
Nafarroako Ospitale Gunetik jakinarazi dute zazpi lagun eraman dituztela artatzera. Adarkatutako hiru lagunetatik bik hiruna adarkada jaso dituzte. Horietako bat 21 urteko burlatarra da; beste bi adarkatuak australiarrak dira. Larrien zauritutako biei ebakuntza egin diete, eta egonkor daude. Gainerako lau zaurituak, berriz, traumatismoengatik eraman dituzte erietxera.
Sanferminetako azken entzierroa luzeena izan da; ia bost minutuko iraupena izan du, atzean geratu den zezenarengatik.
Sevillako (Espainia) zezenek astunak dira, handiak eta adar zabalekoak. Esperientzia zabala dute sanferminetan; arrisku gehien, baina, azken urteetan sortu dute. 1980tik 2000ra adarkada bakarra eman zuten; 2000tik 2012ra, berriz, 11.
Atzokoa, garbia
Atzoko entzierroa, berriz, azkarra izan zen, jendetsua, baina garbia. Adolfo Martin ganadutegiko zezenek (Caceres, Espainia) ez zuen korrikalaririk adarkatu.
Gurutze Gorriak 65 lagun artatu zituen, eta hiru lagun eraman zituzten ospitalera, traumatismoengatik.
