Madalen jaietan bortxatu egin dutela salatu du neska adingabe batek

Madalen jaiak ospatzen ari zela, Ibarrangeluko Laga hondartzan (Bizkaia) bortxatu egin zutela salatu du neska adingabe batek; Eusko Jaurlaritzako Herrizango Sailak baieztatu egin du neskaren salaketa. Ez dute inor atxilotu oraindik, eta Ibarrangeluko hondartzan jazotakoa ikertzen ari da Ertzaintza. Hilabete honetan bertan, beste andre batek ere sexu eraso bat salatu du; Busturiko San Kristobal auzoko jaietan gertatu zen, hilaren 7an; gizon bat atzeman du Ertzaintzak.

Bestalde, gizon bat atxilotu dute Bilbon, sexu eraso bat egin duelakoan. Herenegun gertatu zen erasoa, Herrizaingo Sailak adierazi duenez; emakume bat bere etxera sartzen ari zen, eta gizona oldartu egin zitzaion. Ukituak egiten hasi zitzaion; emakumeak kolpeak eman zizkion, bere burua babestu nahian. Gizonak ihes egin zuen. Biktimak jarraitu egin zion, eta laguntza eske hasi zen korrika egiten zuen bitartean. Oinezko batek oihuak entzun, eta gizona ertzainak iritsi arte geratzea lortu zuen. Emakumeak gertatutakoa kontatu zien ertzainei, eta atxilo hartu zuten gizona. Polizia etxera eraman ostean, epailearen esku utzi dute.

Haur bat bahitzeagatik, atxilo

Beste gizon bat atxilo hartu dute Bilbon, bikotekide ohiaren semea bahitzeagatik eta emakumearekiko zuen urruntze agindua hausteagatik. Herenegun bahitu zuen gizonak haurra, 19:45ean. Ordu horretan hots egin zien haurraren amak ertzainei; jakinarazi zien gizonak bere semea eraman zuela, baimenik gabe. Emakumearen arabera, kalean zegoen haurra senide batekin, gizona etorri eta haurra hartu zuenean. Korrika egin zuen ihes, haurra besoetan zeukala. Ertzainak bahitzailea atzematera irten ziren, emakumearen deia jaso ostean. Bilbo Zaharra kalean topatu zuten, beste gizon batekin. Bahitzaileak ihes egin zuen Polizia ikusi eta berehala; beste gizonari utzi zion haurra. Bilbo Zaharra kalean bertan atxilotu zuten bahitzailea, eta polizai etxera eraman zuten. Hanjarraitzen du, epailearen esku noiz jarriko zain.