Nicolas Madurori eskatu diote "minaren, errepresioaren eta sufrimenduaren estrategia makabroan" ez nahasteko.
Venezuelako Informazio Zerbitzu Nazionaleko kideek atxilotu zuten herenegun Venezuelan Asier Guridi Zaloña, Espainiako eta Frantziako polizien laguntzarekin, etakidea dela leporatuta. Hango komunikabideek "polizia operazio handia" izan dela nabarmendu duten arren, Guridik hamar urte baino gehiago zeramatzan bizitzen Venezuelan, eta errefuxiatuek diotenez, semea eskolara eta emaztea lanera zeramatzala atxilotu zuten.
"Operazio handi baten ordez, sufrimenduak eta minak iraunarazi nahi duen miseria politiko eta humanoaren isla besterik ez da gure lagunaren atxiloketa", kritikatzen dute komunikatuan.
"Mugarria"
Espainiako Barne Ministerioak ohar batean nabarmendu duenez, "terrorismoaren kontrako nazioarteko borrokan mugarritzat jo" du atxiloketa, "Europako Batasuneko bi estatuk eta Ameriketako batek elkar hartuta" egin baitute lan.
Nortasun agiri faltsua zeraman Guridik atxilotzean, Barne Ministerioaren arabera, eta horrek "ETAren deslokalizazio politikaren estrategiari erantzuten" diola esan du, "Frantziako eta Espainiako polizien presioaren ondorio dena".
