‘Manada’ taldeko gizonetako bat atxilotu dute Sevillan

Sanferminetako talde bortxaketan erruduntzat jotako bost gizonetako bat, Angel Boza, atxilotu dute Sevillako udaltzainek. Berri agentziek polizia iturriak aipatuz esan dutenez, eguzkitako betaurreko batzuk lapurtu ditu saltoki gune handi batean, eta autoarekin ospa egiten ari zenean segurtasun zaindari bat harrapatzen saiatu da autoarekin. Gainera, iturri berberek aipatzen dutenez, ez zuen gidatzeko baimenik ere. Ser irrati kateak jakitera eman duenez, gertatutakoaren berri eman zaio Nafarroako Auzitegi Nagusiari. Hark erabaki behar du orain baldintzapeko askatasuna eteten dion edo ez. 2016ko sanferminetan delitu sexualak egitea egotzita, bederatzi urteko espetxe zigorra ezarri zioten iragan apirilean. Behin-behinean aske dago pasa den ekainaren 22tik, gainerako beste laurak bezala, 6.000 euroko bermea ordainduta, epaia irmoa izan arte.