Emakume baten hilketa salatzeko elkarretaratzea egin dute, gaur goizean, Bilboko udaletxe atarian. Udaleko ordezkariak eta alderdi politikoetako hainbat arduradun bildu dira. Besteak beste, Juan Mari Aburto alkatea, Josu Erkoreka Eusko Jaurlaritzako bozeramailea eta Unai Rementeria Bizkaiko ahaldun nagusia.
Maguette Mbeugou da eraildako emakumea. 25 urte zituen. Atzo aurkitu zuten gorpua, bere etxean, Bilbon. Ertzaintzak ordu gutxira atxilotu zuen bikotekidea, hark hil zuelakoan. Biktimak gizonaren aurkako salaketa bat jarrita zeukan Udaltzaingoan, genero indarkeriagatik. Ertzaintzak gaur topatu du ustez hilketarako erabilitako labana, etxe inguruko zaborrontzi batean. Hainbat iturriren arabera, gainera, atzo gorpua topatu baino 24 ordu lehenago hil zuen Mbeugou bere bikotekideak. 24 ordu egin zituen etxean hilda, eta iturri horien arabera, hiltzaileak berekin utzi zituen haren bi alaba txikiak.
Aburto alkateak adierazi du "egun tristea" dela, eta gaineratu du biktimaren bikotekidea atxilotu izana dela albiste on bakarra. Aburtok ohartarazi du "hiltzaileak, bortxatzaileak eta emakumeei tratu txarrak egiten dizkietenak sobran" daudela Bilbon.
Izaskun Landaida Emakundeko zuzendaria ere elkarretaratzean izan da. Mbeugouren sendiari "babesa eta elkartasuna" adierazi dizkio. Landaidak nabarmendu du emakumeen hilketak "berdintasunik ezaren ezaugarririk latzena" direla.
Emakumeen Mundu Martxak Mbeugouren hilketa salatzeko manifestaziora deitu ditu gaur iluntzerako, Hego Euskal Herriko lau hiriburuetan. Bilbon, Gasteizen eta Iruñean. Jendetza elkartu da haietan.
6 emakume erail ditu indarkeria matxistak aurten Euskal Herrian! Azkena Maguette Mbeugou, 25 urteko emakumea, Bilbon erail du bere bikotekide ohiak. ASKI DA! #IndarkeriaMatxistarikEz ADI MOBILIZAZIOEI!@argia@pikaramagazine@EcuadorEtxea@topatu_eus@eitbAlbisteakpic.twitter.com/AK8DJvydG7
— EH Emakumeen Martxa (@emakumemartxa) September 26, 2018
