Espainiako Poliziak atxilo hartu du Manos Limpias elkarteko idazkari nagusi Miguel Bernard, estortsio, erakunde kriminal, agiri faltsutze eta ogasunaren aurkako iruzur delituak egitea egotzita. Bernardez gain, haren zenbait laguntzaile zuzen atxilotzeko asmoa du Poliziak.
Ser irrati kateak polizia iturriak aipatuta zabaldu duenez, zantzuak daude ondorioztatzeko pertsonei, enpresei eta erakundeei estortsioa egin ziela elkarteak, salaketa aurkeztu eta, ondoren, horiek kentzearen truke dirua eskatuz.
Santiago Pedraz epailea ari da auzia ikertzen, eta zazpi miaketa agindu ditu. Asteazkenean zabaldu zen ikerketaren berri.
