Manuel Vaquez Montalban idazle katalana hil da

Manuel Vazquez Montabalbanek (Bartzelona, 1939) obra ugaria utzi du: literatur lan oparoa ez ezik, kazetaritza arloko artikulu zorrotz ugari.

60.eko hamarkadan hasi zen idazle gisa nabarmentzen, hasiera hartan, poeta gisa. Gerora, ordea, nobela beltzaren arloan izan zuen arrakasta handiena, Pepe Carvalho detektibearen inguruko istorien bidez. Nolanahi ere, ez ziren intriga narrazio hutsak; aitzitk, garaiko Espainiaren ikuspuntu zorrotza eskaintzen zuten Carvalho protagonista zuten nobela haiek.

1990ean Galindez nobela plazaratu zuen, hain justu, Jesus Galindez Espainiako Gerran erbestera alde egin behar izan zuen eta, gero, Errepublika Donomikarreko Trujillo diktadorearen aginduz New Yorken hil zuten euskal herritarraren ibileretan oinarrituta.

Literatur ibilbide luze horretan hainbat sari jaso zituen; hala nola, Planeta saria Espainian, Prix Internacional de Litterature Policienne Frantzian, eta Ennio Flaiano Nazioarteko Literatura Saria Italian.

Prentsan artikulu asko idatzi zituen, eta egun zutabegilea zen Madrilgo El Pais egunkarian eta Interviu aldizkarian.

Politikarekin eta gizarteko arazoekin engaiatutako intelektuala zen, beti ere, ezkerreko ikuspuntu batetik. Gaztetan Francoren diktaduraren aurkako borrokan parte hartu zuen, eta FLP Herri Askapenerako Fronteko militante izan zen. Geroago, PSUC Kataluniako Alderdi Sozialista Batuko kide izan zen. Azken urteetan zapatistei eta antzeko mugimenduei behin baino gehiagotan adierazi zien atxikimendua bere artikuluen bidez.

Bihotza aspalditik zuen gaixo. Duela bederatzi urte ebakuntza zaila egin zioten Bartzelonan: lau bypass ezarri zizkioten.